Part 27

ഇന്ത്യയുടെ ആദ്യ റോക്കറ്റ് പരീക്ഷണം പരാജയപ്പെട്ടു.  തുമ്പയായിരുന്നു രാജ്യത്തിന്റെ ശ്രദ്ധാ കേന്ദ്രം.  പരാജയം രൂചിച്ച് ടീം ഇന്ത്യ.  തുമ്പയിലെ റോക്കറ്റ് വിക്ഷേപണ കേന്ദ്രത്തിലേക്ക് സാക്ഷാല്‍ വിക്രം സാരാഭായ് എത്തുന്നു.  വളരെ കാര്‍ക്കശ്യത്തോടു കൂടി അബ്ദുള്‍കലാമിനോട് തന്നെ വന്നു കാണുവാന്‍ നിര്‍ദ്ദേശിച്ചു.  പരാജിതന്റെ മുഖവുമായി എ പി ജെ അബ്ദുള്‍കലാം എന്ന ശാസ്ത്രജ്ഞന്‍ സാരാഭായിയുടെ മുന്നില്‍ തലകുനിച്ചു നിന്നു.  ഒന്നും തന്നെ പറയാതെ വിക്രം സാരാഭായ് കലാമിന് ഒരു കവര്‍ നല്‍കി.  കവര്‍ പൊട്ടിച്ച് വായിച്ച കലാം വളരെ വിനയത്തോടുകൂടി മറുപടി പറയാന്‍ ശ്രമിക്കും മുന്‍പ് സാരാഭായ് ഇടപെട്ടു.  താങ്കളുടെ പ്രൊമോഷന്‍ ലെറ്റര്‍ ആണിത്.  ഇത് സ്വീകരിക്കുക.  റോക്കറ്റ് പരീക്ഷണപരാജയം ഇതിനൊരു തടസ്സമല്ല.  സാരാഭായ് തുടര്‍ന്നു: തോല്‍വി സാധാരണമാണ്.  വിജയത്തേക്കാള്‍ തോല്‍വിയില്‍ നിന്നുമാണ് നാം പഠിക്കുക.  താങ്കള്‍ ശരിയായ ദിശയിലാണ് പോകുന്നത് തീര്‍ച്ചയായും വിജയിക്കും.  ആ വിശ്വാസം ശരിയായിരുന്നു. പിന്നെയുള്ള കാലം ഇന്ത്യ ബഹിരാകാശ ക്ലബ്ബില്‍ അംഗമായി.  മിസൈല്‍ വിദ്യയില്‍ മുന്നിലെത്തി.  അതിനായി കലാം സ്വന്തം ജീവിതം തന്നെ മാറ്റിവെച്ചു.  പരാജയവും വിജയവും പലകുറി നമ്മള്‍ പറഞ്ഞും കേട്ടും അറിഞ്ഞതാണ്.  എന്നാല്‍ പരാജയത്തിന്റെ സമയത്തും പരാജിതന്റെ ദിശ ശരിയാണ് എന്ന് ഉറച്ചുവിശ്വസിക്കുവാന്‍ കാണിക്കുന്ന ദീര്‍ഘവീക്ഷണം, അതായിരുന്നു ഏറ്റവും ശ്രേഷ്ഠം.  പരാജയം സാധാരണമാണ്.  അതുകൊണ്ട് തന്നെ പരാജിതനെ കൂടെക്കൂട്ടാനും മുന്നേ നയിക്കാനും നമുക്ക് സാധിക്കട്ടെ - ശുഭദിനം