Part - 55

അമേരിക്കയിലെ മിസോറി സംസ്ഥാനം.  മാര്‍ഷ് ഫീല്‍ഡ് എന്ന കുഗ്രാമം.  നാട്ടില്‍ അറിയപ്പെടുന്ന കുടുംബത്തില്‍ 7 മക്കളില്‍ മൂന്നാമന്‍.  പിതാവ് ജോണ്‍, അമ്മ വെര്‍ജീനിയ ലീ.  നാട്ടില്‍ അറിയപ്പെടുന്ന കുടുംബം.  ധാരാളം ഭൂസ്വത്ത്.  ഇതെല്ലാമായിരുന്നു ആ ബാലന്റെ ബാല്യ പശ്ചാത്തലം.  അധ്യാപകരുടെ നോട്ടപ്പുള്ളി.  ക്ലാസ്സില്‍ അച്ചടക്കം തീരെയില്ല.  എന്നാല്‍ ആ അച്ചടക്കമില്ലായ്മയുടെ കാരണം മറ്റൊന്നായിരുന്നു.  അധ്യാപകര്‍ പറഞ്ഞുകൊടുക്കുന്ന കാര്യങ്ങള്‍ വളരെ വേഗം മനസ്സിലാക്കിയശേഷം സമയം പോകാനുള്ള കുസൃതികളായിരുന്നു അവയെല്ലാം.  എല്ലാ വിഷയങ്ങളിലും മികവ് .  പക്ഷെ, സ്‌പെല്ലിങ്ങ് മാത്രം അറിയില്ല.  സ്‌പെല്ലിങ്ങ് ശ്രദ്ധിക്കാന്‍ താല്‍പര്യവുമില്ല.  ഒഴിവുവേളകള്‍ മുഴുവന്‍ ആകാശത്തേക്ക് നോക്കിയിരിക്കും.   ആകാശം അവനോടും, അവന്‍ ആകാശത്തോടും അവരുടേതായ ഭാഷയില്‍ എന്തോ സംസാരിച്ചുകൊണ്ടിരുന്നു.  ഒരു ജന്മദിനത്തില്‍ മുത്തച്ഛന്‍ ഒരു സമ്മാനം നല്‍കി.  തോട്ടത്തില്‍ മുത്തച്ഛന്‍ സ്ഥാപിച്ചിരുന്ന ദൂരദര്‍ശിനിയിലൂടെ ഒരു രാത്രി മുഴുവന്‍ ആകാശകാഴ്ചകള്‍ കാണുവാനുള്ള അനുവാദമായിരുന്നു ആ സമ്മാനം.  ആ നോട്ടം അവിടംകൊണ്ട് തീര്‍ന്നില്ല.  അതൊരു തുടക്കമായിരുന്നു.  കോടാനുകോടി നക്ഷത്രങ്ങള്‍, നെബുലകള്‍, ക്ഷീരപദങ്ങള്‍, പ്രപഞ്ചമൊട്ടാകെയും അതങ്ങനെ വികസിച്ചുകൊണ്ടിരുന്നു.  ഒരു പിറന്നാള്‍ സമ്മാനത്തിലൂടെ, ഒരു നക്ഷത്ര തിളക്കത്തിലൂടെ, ലോകപ്രശസ്തനായ ജ്യോതി ശാസ്ത്രജ്ഞന്‍ എഡ്വിന്‍ ഹബ്ബിള്‍ പിറവിയെടുത്തു.  പിന്നീട് ഇതുവരെയുള്ള എല്ലാ ജ്യോതി ശാസ്ത്ര കണ്ടെത്തലുകളുടേയും ആധാരശില എഡ്വിന്‍ ഹബ്ബിളിന്റെ നക്ഷത്ര തിളക്കമുളള കണ്ടെത്തലുകള്‍ ആയിരുന്നു.  അര്‍ത്ഥപൂര്‍ണ്ണമായൊരു സമ്മാനം, അര്‍ത്ഥപൂര്‍ണ്ണമായ മറ്റൊരു തുടക്കമാകുന്നു.  കൊടുക്കുന്നത് ഒരു നക്ഷത്ര തിളക്കമാകട്ടെ.. വഴി കാണിക്കാന്‍ ആ നക്ഷത്രങ്ങള്‍ എന്നും മുന്നിലുണ്ടാകട്ടെ ...
നക്ഷത്ര തിളക്കമാര്‍ന്ന ക്രിസ്തുമസ്ദിനാശംസകള്‍.