ഒരിക്കല്‍ പൂവ് തേനീച്ചയോട് ചോദിച്ചു: അനേകായിരം പൂക്കളില്‍ നിന്ന് നീ കഷ്ടപ്പെട്ട് ശേഖരിച്ചുവെയ്ക്കുന്ന തേന്‍ ഒരൊറ്റ നിമിഷം കൊണ്ട് കരടി എടുത്തുകൊണ്ടുപോകുമ്പോള്‍ നിനക്ക് സങ്കടം തോന്നുന്നില്ലേ... തേനീച്ച ഇങ്ങനെ മറുപടി പറഞ്ഞു: ഞാന്‍ എന്തിനാണ് സങ്കടപ്പെടുന്നത്. കരടിക്ക് തേനല്ലേ കൊണ്ടുപോകാന്‍ സാധിക്കുകയുള്ളൂ. അത് എടുക്കാനുള്ള എന്റെ കഴിവിനെ കൊണ്ടുപോകാന്‍ സാധിക്കില്ലല്ലോ.. ഇതുപോലെ നമുക്ക് ചുറ്റും നടക്കുന്ന ചില കാര്യങ്ങളുണ്ട്. ഒരാള്‍ ഒരു സംരംഭം തുടങ്ങി വിജയിച്ചാല്‍ പിന്നെ അതിനെ അപ്പാടെ പകര്‍ത്തിക്കൊണ്ട് കൂണുപോലെ ധാരാളം സംരംഭങ്ങള്‍ തുടങ്ങുന്ന ചിലരുണ്ട്. അത് പിന്നീട് അതില്‍ ആര്‍ക്കും വിജയിക്കാന്‍ കഴിയാത്ത അവസ്ഥയുണ്ടാക്കുകയും ചെയ്യും. ഒരു സംരംഭകന്റെ വളരെ നാളത്തെ റിസര്‍ച്ചും പരിശ്രമവുമാണ് ഒരു പുതുസംരംഭം. അത് നൊടിനേരം കൊണ്ടാണ് ചിലര്‍ അപ്പാടെ കോപ്പിയടിക്കുന്നത്. സംരംഭത്തിന്റെ കാര്യത്തില്‍ മാത്രമല്ല, നിരവധി മേഖലകളിലും ഇത്തരം കോപ്പിയടികള്‍ നമുക്ക് കാണാന്‍ സാധിക്കും. ഇനിയും ഇത്തരം അനുഭവങ്ങള്‍ നേരിട്ടാല്‍ നമ്മോട് തന്നെ നമുക്ക് ഇങ്ങനെ പറയാം. മറ്റുള്ളവര്‍ പകര്‍ത്തുന്ന ലെവലില്‍ നാം എത്തിയിട്ടുണ്ടെങ്കില്‍ അതും നമ്മുടെ വിജയം തന്നെയാണ് , നമ്മുടെ കഠിനാധ്വാനത്തിന്റെ ഫലമാണ്. നമുക്കും തേനീച്ചയെപ്പോലെ ചിന്തിച്ച് സന്തോഷത്തോടെ, അഭിമാനത്തോടെ മുന്നോട്ട് തന്നെ പോകാം.
0 comments:
Post a Comment