Part - 56
Part - 55
10 വയസ്സുകാരന്‍ ജോണിക്ക് വരും ദിവസങ്ങളില്‍ സ്‌കൂളില്‍ സൈക്കിളോട്ടമത്സരമാണ്. അവനതില്‍ പങ്കെടുക്കുന്ന വിവരം പിതാവായ ജോണ്‍ ബോയിഡിനെ അറിയിച്ചു. സ്‌കോട്ട്‌ലാന്റിലെ ബല്‍ഫാസ്റ്റ് എന്ന ഗ്രാമത്തിലെ മൃഗഡോക്ടറാണ് അദ്ദേഹം. കാലം 1887. അക്കാലത്ത് മുച്ചക്രസൈക്കിളുകളാണ് ഉണ്ടായിരുന്നത്. 'ഞാനെന്റെ പരമാവധി ശക്തി ഉപയോഗിച്ചാലും ചരലിലും മണ്ണിലും കൂടി സൈക്കിള്‍ മുന്നേറുക പ്രയാസമാണ്' . ജോണി പിതാവിനെ അറിയിച്ചു. മകനെ എങ്ങനെ സഹായിക്കാം എന്നായി പിന്നീട് ജോണിന്റെ ചിന്ത. പൂന്തോട്ടം നനയ്ക്കുന്നതിനിടയില്‍ ഒരു റബ്ബര്‍ കുഴല്‍ ജോണിന്റെ ശ്രദ്ധയില്‍ പെട്ടു. അദ്ദേഹം അത് മുറിച്ച് 3 കഷ്ണമാക്കി വട്ടത്തില്‍ ചേര്‍ത്തൊട്ടിച്ച് സൈക്കിള്‍ വീലുകളില്‍ കെട്ടിവെച്ചു. എന്നിട്ട് ഒരു ദ്വാരമുണ്ടാക്കി അതിലൂടെ കാറ്റ് നിറച്ചു. ആദ്യത്തെ സൈക്കിള്‍ ട്യൂബ് അവിടെ പിറന്നു. മത്സരത്തില്‍ ജോണി വിജയിച്ചു. ആളുകള്‍ ട്യൂബിന് വേണ്ടി ജോണിനെ സമീപിച്ചു. ക്രമേണ മറ്റൊന്നിനും സമയമില്ലാത്ത വണ്ണം ജോണ്‍ തിരക്കിലായി. ഒരിക്കല്‍ ജോണിയുടെ സൈക്കിള്‍ സവാരി ഒരു വഴിയാത്രക്കാരന്‍ ശ്രദ്ധിച്ചു. ആരാണ് ഈ ട്യൂബ് ഉണ്ടാക്കി തന്നെതെന്ന് കുട്ടിയോട് ചോദിച്ചപ്പോള്‍ തന്റെ പിതാവാണെന്ന് ജോണി മറുപടി നല്‍കി. അയാള്‍ ജോണ്‍ ബോയിഡിനെ തേടി വീട്ടില്‍ എത്തി. കണ്ടുപിടുത്തത്തെ അഭിനന്ദിച്ചു. കണ്ടുപിടുത്തത്തിന്റെ പേറ്റന്റിന് അപേക്ഷിക്കാന്‍ നിര്‍ദ്ദേശവും നല്‍കി. അങ്ങനെ ജോണ്‍ പേറ്റന്റ് രജിസ്റ്റര്‍ ചെയ്തു. തന്റെ മുഴുവന്‍ പേരിലായിരുന്നു ആ രജിസ്‌ട്രേഷന്‍. ആ പേര് ഇങ്ങനെ ആയിരുന്നു. ജോണ്‍ ബോയിഡ് ഡണ്‍ലപ്. കാറ്റ് നിറച്ച റബ്ബര്‍ ബാന്റ്, ടയര്‍ ട്യൂബിന് അദ്ദേഹം നല്‍കിയ നിര്‍വ്വചനം ഇതായിരുന്നു. തുടര്‍ന്ന് ഒരു അയര്‍ലന്റ് കമ്പനി ഡണ്‍ലപ് ടയര്‍ ട്യൂബുകളുടെ നിര്‍മ്മാണം ഏറ്റെടുത്തു. 50-ാമത്തെ വയസ്സില്‍ ഡണ്‍ലപ് മറ്റൊരു കാര്യം കൂടി ചെയ്തു. താന്‍ കണ്ടുപിടിച്ച ടയര്‍ട്യൂബിന്റെ ഗുണം അറിയാന്‍ വേണ്ടി സൈക്കിള്‍ സവാരി പഠിച്ചു. ഡണ്‍ലപ് ടയര്‍ട്യൂബ് പിന്നീട് ഗതാഗതരംഗത്തെ വലിയ മാറ്റങ്ങള്‍ക്ക് വഴിതുറന്നു. നമ്മളെല്ലാവരുടേയും ഓര്‍മ്മകളില്‍ ഇടയ്‌ക്കെങ്കിലും ഡണ്‍ലപ് കടന്നുവരാറുണ്ട്. എന്നാല്‍ ഇതൊരു വലിയ സംഭവമാകും എന്ന് മുന്‍കൂട്ടികണ്ട് യാതൊരു ലാഭേച്ഛയില്ലാതെ പേറ്റന്റിന് നിര്‍ദ്ദേശിച്ച അജ്ഞാതനെ ആരെങ്കിലും ഓര്‍ക്കുന്നുണ്ടാകുമോ? ഒരു വാക്കും പാഴ്‌വാക്കല്ല. എല്ലാ വാക്കുകളും കേള്‍ക്കുക. സാധ്യമായത് സ്വീകരിക്കുക. - ശുഭദിനം
Part - 54
Part - 53
Part - 55
നക്ഷത്ര തിളക്കമാര്‍ന്ന ക്രിസ്തുമസ്ദിനാശംസകള്‍.
Part - 52
ആ തവള ആദ്യമായാണ് തേരട്ടയെ കാണുന്നത്. തേരട്ടയുടെ കാലുകളുടെ എണ്ണം കണ്ടപ്പോള്‍ തവളക്ക് അത്ഭുതമായി. 'ഞാന്‍ നാലു കാലുകള്‍ തന്നെ പലപ്പോഴും കഷ്ടപ്പെട്ടാണ് ഉപയോഗിക്കുന്നത്. നീ എങ്ങിനെയാണ് ഇത്രയേറെ കാലുകള്‍ ഒരു ബുദ്ധിമുട്ടും കൂടാതെ ഉപയോഗിക്കുന്നത് ? ഏതു കാലാണ് നീ ആദ്യം വെക്കുക? ' അപ്പോള്‍ മുതല്‍ തേരട്ടയും ഇത് ശ്രദ്ധിക്കാന്‍ തുടങ്ങി. ആദ്യം ഏതു കാല്‍, പിന്നെ ഏതു കാല്‍... ഇത് ശ്രദ്ധിച്ച് ശ്രദ്ധിച്ച് തേരട്ടക്ക് ഒരടി മുന്നോട്ട് വെക്കാന്‍ സാധിക്കാതായി. വീണ്ടും തവളയെ കണ്ടപ്പോള്‍ തേരട്ട പറഞ്ഞു: ' ദയവു ചെയ്ത് ഈ ചോദ്യം നീയിനി ഒരു അട്ടയോടും ചോദിക്കരുത്. ഒന്നും ആലോചിക്കാതെ സ്വസ്ഥമായി ഞാന്‍ നടന്നിരുന്നതാണ്. ഇപ്പോള്‍ ഒരടിപോലും എനിക്ക് മുന്നോട്ട് വെയ്ക്കാന്‍ സാധിക്കുന്നില്ല. നീയെന്റെ ജീവിതമാണ് നശിപ്പിച്ചത്... ' സ്വതന്ത്രവും സ്വാഭാവികവുമായ ചലനങ്ങളാണ് നമ്മുടെ ജീവിതത്തിന്റെ സൗന്ദര്യം. നമ്മുടെ സമ്പത്തും അതു തന്നെയാണ്. എല്ലാ കാര്യത്തിന്റെയും ഉള്ളറിഞ്ഞും ഉദ്ദേശമറിഞ്ഞും പ്രതികരിക്കേണ്ട ആവശ്യമില്ല. തനതു ശൈലിയില്‍ ഒരു നിബന്ധനകളുമില്ലാതെ അവ കടന്നു പോകട്ടെ. ജന്മം കൊണ്ടും കര്‍മ്മം കൊണ്ടും സ്വാംശീകരിച്ച സഹജഭാവങ്ങളെ അവയുടെ നൈസര്‍ഗികതയില്‍ വളരാന്‍ അനുവദിക്കുമ്പോഴാണ് ഓരോരുത്തരും തങ്ങളുടെതായെ ഒരു ലോകം തന്നെ സൃഷ്ടിക്കുന്നത്. അനാവശ്യമായ ചിന്താകുഴപ്പങ്ങള്‍ കുത്തിവെയ്ക്കുക എന്നതാണ് ഒരാളുടെ ആത്മവിശ്വാസം തകര്‍ക്കാനുള്ള എളുപ്പമാര്‍ഗ്ഗം. ജീവിതവഴിയില്‍ കാണുന്ന എല്ലാവര്‍ക്കും കാതോര്‍ത്തിരുന്നാല്‍ മുന്നോട്ടും പിന്നോട്ടും എന്തിന് നടക്കാനുള്ള ശേഷിപോലും നമുക്ക് നഷ്ടപ്പെടും. അതിനാല്‍ നാം ആവശ്യമുള്ളവയെക്കുറിച്ച് മാത്രം ആലോചിക്കുക, മറ്റെല്ലാം അവഗണിക്കാാന്‍ ശീലിക്കുക - ശുഭദിനം
Part -51
'ചിലവ് ചെയ്യണം' . നാം എത്ര തവണ മറ്റുള്ളവരോട് പറയുകയും, സന്തോഷത്തോടെ ചെയ്യുകയും ചെയ്തിരിക്കുന്നു. ജീവിതത്തിലെ വിജയങ്ങള്‍ക്കും,സന്തോഷങ്ങള്‍ക്കും നമ്മള്‍ വെക്കുന്ന സ്‌നേഹമുളള ഉപാധിയാണ് ഈ ചിലവ് ചെയ്യല്‍. ഇതും ഒരു ചിലവ് ചെയ്യലിന്റെ കഥയാണ്. 1989 മെയ് 22 ന് അഗ്നി മിസൈലിന്റെ വിക്ഷേപണം നിശ്ചയിച്ചിരിക്കുകയാണ്. വിക്ഷേപണത്തിനു സാക്ഷിയാകാന്‍ പ്രതിരോധമന്ത്രി കെ. സി പന്ത് തലേന്നു തന്നെ എത്തി. അദ്ദേഹം കലാമിനോടു ചോദിച്ചു. 'കലാം, നാളെ അഗ്നിയുടെ വിജയം ആഘോഷിക്കാന്‍ ഞാന്‍ എന്താണ് ചെയ്യേണ്ടത്?' കലാം ഉടന്‍ പറഞ്ഞു: 'ഇവിടെ ഞങ്ങളുടെ ഗവേഷണകേന്ദ്രത്തില്‍ നടാന്‍ ഒരു ലക്ഷം വൃക്ഷത്തൈകള്‍ ഞങ്ങള്‍ക്കുവേണം.' . മന്ത്രി അത്ഭുതപ്പെട്ടുപോയി. അദ്ദേഹം പ്രതീക്ഷിക്കാത്ത മറുപടിയായിരുന്നു അത്. മന്ത്രി പറഞ്ഞു: ' നാളെ നാം തീര്‍ച്ചയായും വിജയിക്കും' മന്ത്രിയുടെ വാക്കുകള്‍ പോലെ പിറ്റേന്ന് അഗ്നി വിജയത്തിലേക്ക് കുതിച്ചു! ഒരു പാര്‍ട്ടിയില്‍ അവസാനിപ്പിക്കാവുന്ന സന്തോഷം, അതിനും എത്രയോ മുകളിലാണ് തലമറകളുടെ ഭാവിയെ കരുതിയുളള ഒരു 'സമ്മാനം'. നമ്മുടെ മുന്നില്‍ തെളിയുന്ന ഒരു ചെറിയ സാധ്യത പോലും പരമാവധി നല്ലതിനുവേണ്ടി പ്രയോജനപ്പെടുത്താന്‍ നമുക്കാകട്ടെ - ശുഭദിനം
Part - 50
സ്‌കോട്ട്‌ലാന്റിലെ ഒരു മലയോര ഗ്രാമത്തില്‍ ജനിച്ച വെള്ളക്കാരന്‍. കൃഷിയായിരുന്നു കുടുംബവരുമാനം. 1841 മെയ് 17 ന് ജനനം. 1856 ല്‍ ഏറ്റവും ബുദ്ധിശാലിയായ വിദ്യാര്‍ത്ഥിക്കുള്ള ഡ്യൂക്ക് മെഡല്‍ സ്വന്തമാക്കി. തുടര്‍ന്ന് എഡിന്‍ബര്‍ഗ് യൂണിവേഴ്‌സിറ്റിയില്‍ ഇംഗ്ലീഷുകാരുടെ ഗ്ലാമര്‍ സ്വപ്‌നമായിരുന്ന ഇന്ത്യന്‍ സിവില്‍ സര്‍വ്വീസ് ആയിരുന്നു ലക്ഷ്യം. 1862 ആഗസ്റ്റ് 16 ന് മദ്രാസ് സിവില്‍ സര്‍വ്വീസില്‍ നിയമനം നേടി. അതുവരെ ശുപാര്‍ശകളിലൂടെ മാത്രം നടന്നിരുന്ന നിയമനം ഒരു ഇംഗ്ലീഷ് കര്‍ഷക യുവാവ് അധ്വാനത്തിലൂടെ കരസ്ഥമാക്കി. തുടര്‍ന്ന് മലയാളം, തെലുങ്ക്, തമിഴ് എന്നീ മൂന്ന് പ്രാദേശിക പരീക്ഷകള്‍ കൂടി പാസ്സായി. പിന്നീട് ഒരു പ്രവിശ്യയുടെ സബ് കളക്ടറും, ജോയിന്റ് മജിസ്‌ട്രേറ്റുമായി. ആ കാലത്ത് അവിടത്തെ ജന്മി വ്യവസ്ഥയില്‍ അതൃപ്തരായ കര്‍ഷകര്‍ ഭരണകൂടത്തിനെതിരെ തിരിഞ്ഞു. ഭരണ നേതൃത്വം ഇക്കാര്യം പഠിച്ച് റിപ്പോര്‍ട്ട് ചെയ്യാന്‍ ആ യുവ കളക്ടറെ ചുമതലപ്പെടുത്തി. സത്യസന്ധവും നീതിയുക്തവുമായ ഒരു റിപ്പോര്‍ട്ടായിരുന്നു സമര്‍പ്പിക്കപ്പെട്ടത്. കര്‍ഷകന്റെ കഷ്ടപ്പാടുകള്‍ റിപ്പോര്‍ട്ട് ചെയ്തത് ജന്മിമാര്‍ക്ക് രസിച്ചില്ല. അവരുടെ സ്വാധീനം മൂലം റിപ്പോര്‍ട്ട് തഴയപ്പെട്ടു. 1884 - സര്‍ക്കാര്‍ സര്‍ ടി മാധവറാവുവിനെ പ്രസിഡന്റാക്കി ഈ യുവ കളക്ടറേയും കമ്മിറ്റിയിലുള്‍പ്പെടുത്തിക്കൊണ്ട് പുതിയ റിപ്പോര്‍ട്ട് ആവശ്യപ്പെട്ടു. ആ റിപ്പോര്‍ട്ടും തഴയപ്പെട്ടു. 1886 ല്‍ വീണ്ടും കമ്മിറ്റി രൂപീകരിച്ചു. ഇത്തവണ ആ കമ്മിറ്റിയില്‍ യുവ കളക്ടര്‍ ഉണ്ടായിരുന്നില്ല. അദ്ദേഹത്തിന്റെ നിര്‍ദ്ദേശങ്ങളെല്ലാം ഒഴിവാക്കിക്കൊണ്ട് പുതിയൊരു റിപ്പോര്‍ട്ട് സമര്‍പ്പിക്കപ്പെട്ടു. ആ റിപ്പോര്‍ട്ടിനേയും ജന്മിമാര്‍ എതിര്‍ത്തു. ആ നാട്ടുരാജ്യത്തിന്റെ പുഴകളേയും മലകളേയും മണ്ണിനേയും വെള്ളത്തേയും സ്‌നേഹിച്ച ആ യുവഭരണാധികാരി തന്റെ റിപ്പോര്‍ട്ടിലെ ഭാഗങ്ങളൊന്നും തിരുത്താന്‍ തയ്യാറായില്ല. അധികാരികളുടെ നിര്‍ദ്ദേശങ്ങള്‍ അനുസരിക്കാതിരുന്ന അദ്ദേഹത്തെ, അദ്ദേഹത്തിന്റെ സ്വപ്‌ന പദവിയില്‍ നിന്നും സര്‍ക്കാര്‍ പിരിച്ചുവിട്ടു. എന്നാല്‍ റിപ്പോര്‍ട്ട് തയ്യാറാക്കാനുള്ള അദ്ദേഹത്തിന്റെ നിരീക്ഷണങ്ങളും പഠനങ്ങളും ആഴത്തിലും പരപ്പിലും ഉള്ളതായിരുന്നു. നിലവിലുള്ള സാമൂഹ്യഅവസ്ഥയുടേയും രാഷ്ട്രീയ നിലപാടുകളുടേയും പ്രകൃതിയുടേയും ചരിത്രത്തിന്റെയും ഭൂമിശാസ്ത്രത്തിന്റെയും ജനജീവിതത്തിന്റെയും എല്ലാവശങ്ങളും ഉള്‍ക്കൊള്ളുന്ന സമഗ്രമായ പഠനവും പരിഹാര നിര്‍ദ്ദേശങ്ങളും കാഴ്ചപ്പാടുകളും അടങ്ങുന്നതായിരുന്നു അദ്ദേഹത്തിന്റെ കണ്ടെത്തലുകള്‍. ജോലിയില്‍ നിന്ന് പിരിച്ചുവിടപ്പെട്ട അദ്ദേഹം താന്‍ ശേഖരിച്ച അറിവുകളെ പുസ്തകമായി ക്രോഡീകരിച്ചു. അതിനദ്ദേഹം ആ നാട്ടുരാജ്യത്തിന്റെ പേര് നല്‍കി. ആ പേര് ഇതായിരുന്നു - മലബാര്‍ ! പിന്നീട് ചരിത്രമായി മാറിയ മലബാര്‍ മാന്വവല്‍. ആ യുവാവ് വില്യം ലോഗനും. അന്ന് ആ ജോലിയില്‍ നിന്നും അദ്ദേഹം പിരിച്ചുവിടപ്പെട്ടില്ലായിരുന്നുവെങ്കില്‍ ഒരു പക്ഷേ മലബാര്‍ മാന്വവല്‍ ഉണ്ടാകുമായിരുന്നില്ല. അവഗണിക്കപ്പെടുന്നത് കഴിവുകേടുകൊണ്ടല്ല. മറ്റൊന്നില്‍ പരിഗണിക്കപ്പെടേണ്ട കഴിവുള്ളതുകൊണ്ടാണ്. - ശുഭദിനം
Part - 49
ടെലിവിഷന്‍ കണ്ടുപിടിച്ചത് ആര് ... ഈ ചോദ്യത്തിന് ജെ എല്‍ ബേഡ് എന്ന ഉത്തരമാണ് ലോകമാകെ അംഗീകരിക്കുന്നത്. എന്നാല്‍ അദ്ദേഹത്തിന് മുന്‍പും പിന്‍പും ആ മേഖലയില്‍ പ്രവര്‍ത്തിച്ചവര്‍ പലരും ടെലിവിഷന്‍ യാഥാര്‍ത്ഥ്യമാക്കിയിരുന്നു. എന്നാല്‍, തങ്ങളുടെ കണ്ടുപിടുത്തത്തിന്റെ പിഴവ് തീര്‍ത്ത് ലോകത്തെക്കൊണ്ട് അംഗീകരിപ്പിക്കാന്‍ അവര്‍ക്ക് സാധിച്ചില്ല. അമേരിക്കക്കാരനായ ചാള്‍സ് ഫ്രാന്‍സിസ് ജെങ്കിന്‍സ് 1925 ല്‍ താന്‍ കണ്ടുപിടിച്ച് ടിവിയുടെ സംപ്രേഷണം നടത്തുകയുണ്ടായി. ബെല്‍ ടെലിഫോണ്‍ കമ്പനിയിലെ ഹെര്‍ബര്‍ട്ട് ഇ ഐവ്‌സും ഫ്രാങ്ക് ഗ്രേയും 1927 ല്‍ ഒരു മെക്കാനിക്കല്‍ ടെലിവിഷന്റെ പൊതു പ്രദര്‍ശനവും നടത്തിയിട്ടുണ്ട്. ഇങ്ങനെ ജര്‍മ്മിനിയിലും ഹംഗറിയിലുമെല്ലാം പല ഗവേഷകരും ടെലിവിഷന്‍ കണ്ടുപിടച്ചതിന്റെ അവകാശവാദം ഉന്നയിക്കുകയുണ്ടായി. പലരും തങ്ങളുടെ ആദ്യ ടെലിവിഷന്റെ പൊതുപ്രദര്‍ശനവും നടത്തി. ഈ ആദ്യകാല ടെലിവിഷനുകള്‍ ഒന്നും കുറ്റമറ്റത് എന്നു പറയാനാകില്ലായിരുന്നു. അതുപോലെ തന്നെ ജെ.എല്‍ ബേഡിന്റെ ആദ്യ ടെലിവിഷനും ഒട്ടേറെ പോരായ്മകള്‍ ഉള്ളതായിരുന്നു. എന്നാല്‍ ടെലിവിഷന്‍ സംപ്രേഷണം ആരംഭിക്കാന്‍ മുന്‍കൈ എടുത്തു എന്നത് ജെ. എല്‍ ബേഡ് മാത്രം ചെയ്ത കാര്യമാണ്. നിരന്തരപഠനത്തിലൂടെ ടെലിവിഷന്‍ മികവുറ്റതാക്കാന്‍ ബേഡ് ശ്രമിച്ചു. അദ്ദേഹം സ്ഥാപിച്ച കമ്പനി ടെലിവിഷന്‍ സെറ്റുകള്‍ ഉണ്ടാക്കി വില്‍ക്കുകയും ചെയ്തു. ഇതൊക്കെ അദ്ദേഹത്തെ ടെലിവിഷന്റെ പിതാവെന്ന സ്ഥാനത്തിന് അര്‍ഹനാക്കി. ലക്ഷ്യം... അതിനെ ഒരു നിശ്ചിത കാലത്തിന്റെ പരിമിതിയില്‍ നിര്‍ത്തരുത് . തുടര്‍ച്ച അതാണ് വിജയത്തിന്റെ വളര്‍ച്ച - ശുഭദിനം
Part - 48
ഇന്ന് റോബോട്ട് എന്ന വാക്ക് കേൾക്കാത്ത ആരുണ്ട്, ആ വാക്കുകൊണ്ട് ഉദ്ദേശിക്കുന്നത് എന്ത് എന്നും നമ്മുക്ക് കൃത്യമായി അറിയാം, സാങ്കേതിക വിദ്യ എല്ലാ മേഖലയിലും വികസിച്ചുകൊണ്ടേ ഇരിക്കുന്നു, സൈന്റിസ്റ്റുകൾ ലോകത്തിനു ഒരു പുതിയ മുഖം നല്കിക്കൊണ്ടേയിരിക്കുന്നു. റോബോട്ട് അതിലെ നിർണായക ഘടകവും. ഏത് റോബോട്ടിക് എഞ്ചിനീയർ ആയിരിക്കും ഈ വാക്ക് കണ്ടുപിടിച്ചത്. ഉറപ്പായിട്ടും സാങ്കേതിക വിദ്യയുടെ മേഖലയിലെ പ്രഗത്ഭനായ ഒരാൾ എന്നായിരിക്കും നമ്മൾ ചിന്തിക്കുക. എന്നാൽ അങ്ങനെയല്ല, 20ആം നൂറ്റാണ്ടിന്റെ ആദ്യകാലത്തു റഷ്യയിൽ ജീവിച്ചിരുന്ന ഒരു നാടക കൃത്തായിരുന്നു കാരെൻ കാപെക്‌. 1921ൽ അദ്ദേഹം എഴുതിയ നാടകം ആയിരുന്നു Rossumen's Universal Robots. ഒരു ഫാക്ടറിയിൽ യന്ത്ര മനുഷ്യരെ ജോലിക്ക് വെക്കുന്നതും പിന്നീട് ഇവ മനുഷ്യനെതിരെ ആകുന്നതുമാണ് കഥ. റോബോട്ട് എന്ന വാക്ക് ആദ്യം വന്നത് ഈ നാടകത്തിൽ ആയിരുന്നു, അടിമ എന്ന അർത്ഥത്തിൽ ആയിരുന്നു വാക്കിന്റെ ഉപയോഗം, നോക്ക് ഒരു സയൻസ് വാക്ക് പിറവിയെടുത്തത് ഒരു കലാകാരനിൽ നിന്നും !
ഒന്നും പ്രവചന സ്വഭാവ ത്തിൽ കാണരുത്. നമ്മുടെ മേഖലകൾക്ക് വേലികെട്ടരുത്. ഒരുപക്ഷെ നാളെയുടെ നാഴിക കല്ലുകൾ ആകുന്നതു നമ്മുടെ ഒരു ചെറിയ ചിന്ത ആകാം. -ശുഭദിനം
Part - 47
അനിൽ കുംബ്ലെ - ഇന്ത്യയുടെ മികച്ച ക്യാപ്റ്റൻമാരിൽ ഒരാൾ. ഇന്ത്യ കണ്ട മികച്ച ലെഗ് സ്പിന്നർ, ഏകദിനത്തിലും ടെസ്റ്റിലും മികച്ച വിക്കറ്റ് വേട്ടക്കാരൻ, ടെസ്റ്റിൽ 500ൽ പരം വിക്കറ്റുകൾ, ടെസ്റ്റിൽ ഏറ്റവും അധികം വിക്കറ്റെടുത്ത ഇന്ത്യൻ കളിക്കാരൻ, തീർന്നില്ല ടെസ്റ്റിൽ 10 വിക്കറ്റും സ്വന്തമാക്കിയ ബൗളർ ! കുംബ്ലെ അങ്ങനെ വലിയൊരു സംഭവം ആയിരുന്നു ആ കാലത്ത്. ഇനി മറ്റുചിലത് കൂടി ഈ ക്യാപ്റ്റനെ കുറിച്ച്. 2007ൽ ഇന്ഗ്ലണ്ടിനെതിരെ നടന്ന ഓവൽ ടെസ്റ്റിൽ കുംബ്ലെ സെഞ്ചുറി നേടി, അതായിരുന്നു കുംബ്ലെയുടെ ആദ്യത്തെ സെഞ്ച്വറി, അത് മാത്രമായിരുന്നു രാജ്യാന്തര മത്സരത്തിലെ ഒരേയൊരു സെഞ്ചുറിയും. കരിയറിലെ 151 ഇന്നിങ്സിൽ ആയിരുന്നു ആ സെഞ്ച്വറി. മറ്റൊന്നുകൂടി, ആദ്യത്തെ ആ സെഞ്ച്വറി നേടാൻ അദ്ദേഹം നേരിട്ടത് 118 ടെസ്റ്റുകൾ ! ഒരു വശത്തു നേട്ടങ്ങളുടെ കൂമ്പാരം, മറുവശത്തു ഒരു സെഞ്ചുറിക്ക് വേണ്ടി 118 ടെസ്റ്റ്‌ കാത്തിരുന്നു കളിക്കാരൻ, ഏതിനെയാണ് നമ്മൾ ബഹുമാനിക്കേണ്ടത്. ഒരാൾക്ക് എല്ലാ കഴിവുകളും ഉണ്ടാകണം എന്ന് നിർബന്ധം ആവശ്യമില്ല, അല്ലാതെയും ക്യാപ്റ്റൻ ആയി ശോഭിക്കാം - ശുഭദിനം
